रागाने अनेकांची आयुष्य उध्वस्त झालेली आहेत. मात्र, यातून बोध घेणारे फार कमी लोक असतात. राग आणि घमेंड या एका नाण्याच्या दोन बाजू आहेत. घमेंडखोर माणसं खूपदा रागीट असतात. या रागाचे सुद्धा दोन प्रकार आहेत. काही सरळ सरळ तोंडावर रागावतात तर काही तोंडावर गोड बोलतात मात्र मनात राग धरतात. असे तोंडावर गोड बोलून मनात राग धरणारे खूप घातकी असतात. एक वेळ सापाला सोडा पण तोंडावर गोड बोलून पाठीत गद्दारीचा वार करणाऱ्याला कधीच सोडू नका. राग क्षणभराचा असतो, घमेंड आणि इगो सुद्धा क्षणभराचे सोबती असतात. पण, त्याने फुललेली चांगली नाती कोमेजून जातात याचा हा दिलफेक रंगीत माणूस विचारच करीत नाही. राग येणे हे जिवंतपणाचे लक्षण असल्याचे आम्ही वारंवार बोलत आलोय. नेहमीच शांत राहणे सुद्धा गरजेचे नसते. कधी कधी राग येणे सुद्धा खूप जरुरीचे आणि गरजेचे असते. मात्र, हा राग किती ताणायचा याचा  विचार करायला हवा. जे अत्यंत इगो आणि घमेंड असलेले असतात त्यांना तुमच्या जगण्या मारण्याचा आणि असण्या नसण्याचा काहीच फरक पडत नाही. कारण हे लोक खूपदा हलक्या कानाचे आणि हलक्या चारित्र्याचे असल्याने यांना यांच्या सारखेच दिलफेक लोक कायम मिळतात. आपण मात्र इमोशनल असल्याने आपल्याला नातं तुटल्याचं खूप दुःख होतं अशा वेळी आपणही मनाने कणखर व्हायचे असते. अशी खुनशी आणि गद्दार माणसं मेली तरी त्यांच्याकडे ढुंकूनही न पाहण्या इतके आपणही निर्लज्ज व्हायचे.. नाही हो आम्ही जरी असे म्हणत असलो तरी आपण मनाने खूप चांगले असल्याने आपल्याला या गद्दार आणि रंगीत माणसांइतके पाशवी होता येत नाही.. 

इतकी घमेंड काय कामाची हो, असं कितीसं आयुष्य असतं हो, पण हे तुमच्या आमच्या सारख्या चांगल्या लोकांना कळतं. जे स्वतःच्या घरातल्यांचे होत नाही ते आपले काय होणार हेही सत्य आहे. माझ्या परिचयात असे अनेक आहेत जे गरज काढून ढुंगणाला पाय लावून पळून गेले आहेत. पण हरकत नाही देव त्यांचं भलं करो. आपण लाजवाल्यांकडून लाजेची अपेक्षा करायची असते, बेशरम लोकांना काहीही बोला अथवा न बोला काहीही फरक पडत नाही.. आपल्यावर जीव ओवाळून टाकणाऱ्या, आपल्याशी चांगलं वागणाऱ्या, सतत आपल्या भल्याचा विचार करणाऱ्या माणसांना कधीच धोका देऊ नका. एक गोष्ट कायम लक्षात ठेवा जे आज सुपात आहेत त्यांना उद्या जात्यात जायचं आहे हे कायम लक्षात ठेवा. तुमची जवानी, तुमचं तथाकथित सौन्दर्य, तुमचा राग, तुमची घमेंड आणि तुमचा पैसे कायम साथ देत नाही आणि देणारही नाही. साथ देतील ती तुम्ही जीव लावलेली माणसं.. त्यातही जी माणसं तुमच्या पैशावर अथवा तुमच्या तथाकथित जवानीवर लक्ष ठेवून तुमच्या जवळ आलीत ती तुमच्या फायद्याची कधीच ठरणार नाहीत. फायद्याची ती माणसं ठरतील जी तुमच्या भल्याचा विचार करून तुमच्या सोबत आहेत.. आणि म्हणून तर आम्ही नेहमी म्हणतोय ना जरा रागावर नियंत्रण ठेवा. नाहीतर अति राग आणि भीक माग अशी वेळ तुमच्यावर आल्याशिवाय राहणार नाही..

- प्रा. दिपक जाधव. संपादक शब्द खड्ग डिजिटल वृत्तपत्र..